你見過你就會明白
當一個人明知無得救
卻要為左要活著嘅人而去延長生命嘅果種痛苦
依啲咁恐怖嘅畫面每日都發生
80幾歲人arrest左
佢嘅親人堅持要急救
唔救就好似盡唔到孝心咁
然後為左滿足親人嘅願望
我地努力地幫病人做CPR
1分鐘起碼要做100下心外壓
「啪、啪」2聲
條肋骨搓斷左
一下一下咁壓落去
心口都瘀晒
然後好彩嘅
「病人回復心跳，插左喉，要去深切治療部」
你果下會覺得好開心
你嘅屋企人無死到
但你有無聽過活著嘅人比死去嘅人更痛苦？
病人執返條命
但佢已經講唔到野，食唔到野
郁唔到
靠部呼吸機呼吸
然後肋骨好痛
心口好痛
個口插住條喉好唔舒服
靜脈吊梗好多唔同嘅強心針
咁嘅情況可以維持...好耐....
直至到佢下一次再停止心跳
然後可能，
屋企人又接受唔到
再逼多佢再進行多一次急救
再承受一次痛苦
咁，值得咩？
愛一個人係咪等於要無限延長佢嘅生命？
即使生命嘅quality好差？！
如果真係咁
你真係好自私
你做咁多野為嘅只係自己
你只因為。你。自。己。接受唔到你親人嘅死亡
所以先做咁多野
文中嘅Agnes就係因為曾經見過爸爸在延長生命時經歷嘅痛苦，
所以佢決定在媽媽生命嘅盡頭唔再強求
用morphine讓媽媽舒服地離開
希望更多人可以睇到e篇文章
希望大家懂得要放手嘅時候，請放手
唔好再延長病人嘅痛苦啦
真正嘅愛一個人
係喺佢生前對佢好
而唔係喺佢臨死前無限延長一段痛苦嘅生命
Search